Mnr. Jan van Vuuren van AA Cycads in Montana is een van die broodboomeienaars wat onlangs deurgeloop het. Hy het 'n beloning van R10 000 uitgeloof vir inligting wat kan lei tot die inhegtenisneming en skuldigbevinding van die persoon wat 'n boom van R40 000 uit sy persoonlike versameling gesteel het.

Van Vuuren sę broodbome se gewildheid en waarde het die afgelope tien jaar met rasse skrede toegeneem. "'n Boom wat sowat tien jaar gelede vir R500 gekoop is, kan nou verkoop word teen R15 000.

"Op 'n onlangse private veiling in Kwa-Zulu-Natal is twee bome vir onderskeidelik R425 000 en R320 000 verkoop."

Van Vuuren meen die groeiende gewildheid van broodbome kan moontlik daaraan toegeskryf word dat dit prehistoriese plante is wat van 250 miljoen jaar gelede dateer.

Die ouderdom van individuele bome in die natuur is al geskat op sowat 2 000 to 3 000 jaar. So 'n boom staan omtrent 7m hoog. Versamelaars is soms net gek na 'n bepaalde boom se voorkoms.

Die vraag na die bome is tans baie groter as die aanbod. Die feit dat broodbome soveel werd is, lei tot die diefstal van die bome van kwekers en baie bome word selfs uit mense se tuine gesteel. Van Vuuren meen omdat die vraag so groot is, is dit maklik om van gesteelde bome ontslae te raak.

Volgense hom is Suid-Afrikaners "altyd opsoek na 'n winskopie".

'n Onwettige broodboom as 'n "winskopie" kan jou egter tien jaar tronkstraf of 'n boete van R100 000 of albei op die hals haal.

Die departement van natuurbewaring is in 'n verdere voorsorgmaatreël besig om bome met mikroskyfies toe te rus wat nie deur die publiek "gelees" kan word nie. As jy 'n broodboom sonder 'n permit bekom, kan die departement jou vastrek as hulle die mikroskyfie in jou tuin kry.

Van Vuuren sę broodbome wat in die veld uitgegrawe word, oorleef in baie gevalle nie die oorplanting nie. Bome wat egter gekweek word, plant baie maklik oor en groei tien keer vinniger as die bome wat in die natuur voorkom.

Broodbome is op Cites se kategorie 1-lys van bedreigde spesies, saam met renosters en walvisse, maar anders as dié diere kan individue die bome kweek as hulle wil.

Broodbome is eenslagtig, wat beteken daar is manlike en vroulike bome.

Van Vuuren sę die onus rus op die publiek om hierdie unieke bome te bewaar en die onwettige handel daarin te voorkom. As lede van die publiek onraad vermoed in 'n broodboom-transaksie kan hulle supt. Johan Scott bel by 011-274-7631. Vir inligting oor Van Vuuren se gesteelde broodboom kan hy genader word by 012-548-9233.